— 345 —
Sedeng begitoe, teman-temannja soedah bikin sedia barang makanan, bawa roti dan boewah-boewah ka darat dan panggang daging kambing. Betoel pada waktoe daging kambing itoe soedah matang dipanggang, teman-teman itoe dapet melihat Dantes, ijang lagi djalan dengen melompat-lompat dari pada satoe batoe ka lain batoe, sebagimana lakoenja kambing hoetan, dan teman-teman itoe lantes boenjiken satoe senapan aken membri taoe pada Dantes bahoewa makanan soedah sedia.
Dantes lantas menengok dan djalan menoedjoe pada teman-temannja itoe. Tapi dengen sekoenjoeng-koenjoeng Dantes itoe terpeleset, laloe berlakoe limboeng di atas satoe batoe dan lantas djatoh ka bawah sembari betriak,
Sekalian temannja ijang memang ada lihati sadja padanja, lantas berlari-lari mengamperi; tapi Jacopo sendiri sampe paling doeloe ka hadepannja.
Jacopo dapetken Edmond itoe ada berdarah darah serta terletak di tanah; Edmond itoe telah djatoh dari satoe tempat ijang tingginja ada doewabelas atawa limabelas kaki. Orang kasih ija minoem sedikit anggoer, hingga ija djadi segar djoega sedikit sahabis dikasih minoem, ija poen memboekaken matanja, laloe membri taoe dengen soewara merintih, bahoewa ija merasa amat sakit di loetoet dan di pinggang, sedeng kapala ada dirasa berat sekali. Teman-teman lantas maoe gotong padanja ka pasisir; tapi baroe sadja orang rabah padanja, ija lantes triak dan berkata, bahoewa ija tida nanti bisa tahan rasanja sakit, kaloe orang angkat dan gotong-gotong padanja.
Boewat toeroet teman-teman berdoedoek makan, soedah terang Dantes tida bisa; tapi ija tida kapingin teman-teman
