— 346 —
itoe berlapar dengen lantaran dia; maka ija minta, soepaja teman-teman itoe balik sadja kombali ka pinggir laoet; ija sendiri melinken ada merasa ingin tidoer, dan toeroet ija poenja doegaan, kaloe sebentar teman-temannja datang kombali tengok padanja, tentoe sekali ija nanti soedah merasa ringan.
Teman-teman itoe tida sampe misti dipaksa-paksa; kerna samoewa poen soedah merasa lapar dari wanginja daging panggang ada terbitken banjak napsoe makan; maka sigralah djoega ija-orang berdjalan pergi dengen tinggalken Edmond Dantes terletak sendiri-diri.
Sesoedah berlaloe satoe djam lebih, teman-teman itoe dateng kombali pada Dantes, dan dapetken Dantes ada berdoedoek dengen menjender pada satoe batoe karang ijang tertoetoep dengen loemoet tebal. Aken tetapi sangsaranja Dantes boekan djadi koerangan, hanja djadi bertambah. Kapitein kapal meminta, biar Dantes tjoba berbangkit, kerna kapal misti berlajar di itoe hari dioega ka wates Piemont dan Frankrijk, aken toeroenken di sana moewatan kapal ijang satinggalnja. Dantes tjoba bergerak aken toeroet, maoenja itoe Kapitein; tapi pada tiap kali ija berboewat, lantas djoega ija banting dirinja sambil triak dari sebab kasakitan.
„Brangkali patah pinggangnja,’ kata Kapitein dengen perlahan pada matroos-matroos ijang lain: „tapi biar begimana poen adanja sekarang, dia ini satoe teman ijang baik sekali, dan tida haroes kita biarken dia dengen kasangsara di sini; sebab itoe biarlah kita-orang gotong dia ka kapal.“
Tapi setelah Dantes taoe maoe digotong, lantas djoega ija bri taoe ijang ija lebih soeka mati di sitoe djoega, dari
