— 352 —
poen batoe itoe tida tergerak, kerna berat adanja.
Dantes berdiam sekoetika dengen berpikir, laloe ija gali satoe lobang ketjil di antara itoe batoe besar dan tjadas, ijang ada di bawahnja; sesoedahnja sedia, ija isiïn itoe dengen obat bedil, laloe ija sowek selampenja dan membikin soemboe atawa tali-api dengen kain selampe itoe, ijang dipelintir olehnja sambil ditaroi sedikit obat bedil. Sesoedah hoeboengken soemboe itoe pada obat di lobang, ija lantas soeloet itoe dan berlari pergi, dan sigra djoega obat itoe telah meledoek. Itoe batoe besar ada mengisar sedikit sadja, tapi tjadas ijang ada di bawahnja, djadi antjoer dan melesek, hingga dengen lantaran begitoe djadi terbit satoe lobang besar djoega, ijang menemboes ka dalem goewa. Setelah terbit lobang ini adalah kaloewar dan berlari dari sitoe berkian-kian djangkrik dan sebaginja serta satoe oelar besar ijang brangkali djoega djadi penoenggoenja goewa atawa harta ijang ada di goewa itoe.
Sigra djoega Dantes soedah dateng kombali pada itoe batoe besar, ijang sekarang ini soedah djadi dojong ka lamping boekit, sebab sebagian dari djadas ijang ada di bawahnja telah terpental. Dantes lantas tjongkil batoe itoe dengen batang poehoen, hingga batoe itoe lantas terbalik dan teroes tergoeling-goeling di lamping boekit, terdjoen ka dalem laoet. Pada bekasnja itoe batoe ada kalihatan satoe batoe pesagi dan pada tengah-tengahnja batoe ini ada lengket satoe gelang besi.
Dantes bertriak oleh kerna merasa teramat girang. Hatinja ada berdebar keras sekali, kakinja poen bergoemetar. Soedahnja berdiam sekoetika lamanja, Dantes masoekken batang kajoe itoe ka dalem itoe gelang besi, laloe dengen menjong-
