— 353 —
kil, terangkatlah itoe batoe pesagi, dan dapet lihat lobang dalem, di mana ada tangga tjadas ijang tebing sekali. Sekoetika lamanja Dantes memandang pada lobang itoe sambil beringat, bahoewa brangkali djoega lain orang soedah lebih doeloe dapet taoe adanja itoe lobang dan soedah toeroen ka dalemnja, hingga saändennja bener di lobang itoe ada terpendam hartanja itoe kardinal Spada, barangkat djoega harta soedah diambil orang.
„Ja," katanja sendiri-diri: „baiklah akoe djangan terlaloe merasa girang. Kaloe akoe toeroeti girangnja hati, kemoedian tida dapetken apa ijang akoe harep, hatikoe boleh djadi terpetjah. Sebab begitoe, biarlah akoe beringat sadja, ijang kaloe sekarang akoe masoek ka lobang ini, boekanlah sebab ada harepan besar, hanja sebab kapingin taoe apa adanja lobang ini.”
Kemoedian, sesoedahnja berdiam kombali sekoetika, lamanja ija berkata poela: „Tapi saändenja ada itoe harta, dan orang soedah ambil itoe, apa orang itoe nanti maoe bekerdja berat aken toetoepi kombali lobang ini dengen batoe ijang begitoe besar? Sebab begitoe, bolehlah djoega akoe mengharep tapi sedikit sadja.”
Dengen bersenjoem Dantes itoe lantas moelai toeroen ka dalem lobang goewa ijang gelap; tapi semingkin ija masoek ka dalem, semingkin bertambah terang adanja tempat itoe. Sinar terang poen boekan sadja masoek ka goewa itoe dari lobang ijang sekarang ada pada kapala tangga, hanja masoek djoega dari rengat-rengatnja karang ijang tida kalihatan dari loewar.
Sesoedahnja berdiam sedikit lama, Dantes dapet melihat dengen tegas pada sekalian ijang ada di goewa itoe: ma-
