— 363 —
dan djalanken itoe selakoe orang djalanken saëkor koeda.
Orang banjak awasi kapal itoe, sampe pada waktoe soedah tida kalihatan lagi. Ada orang ijang doega, bahoewa kapal itoe ditoedjoeken ka Corsika, ada djoega ijang doega ka Elba, Spanje, dan Afrika; tapi tida seorang doega, ijang kapal itoe ada menoedjoe ka poelo Monte Christo.
Pada hari jang kadoewa, di waktoe sore, Dantes sampe ka itoe poelo penoedjoeännja. Ija tida laboehkan djangkar di palaboehan jang biasa, hanja di itoe kali ijang tersemboeni.
Poelo itoe ada soenji sekali, dan sedari Dantes berlaloe dari sitoe belon ada lain orang datang ka itoe poelo.
Satelah naik ka darat, teroes sadja Dantes pergi ka dalam goewa; harta jang terpendam di sitoe, masih tinggal sebegimana adanja pada waktoe ditinggalken.
Sampe pada besok sorenja, sakalian harta itoe soedah pindah ka dalem kapal dan tersimpen di dalam peti rasia.
Dantes menoenggoe di sitoe delapan hari lamanja; di dalem tempo itoe ija berlajar poetari itoe poelo Monte-Christo.
Di hari jang kadelapan Dantes dapet lihat satoe kapal ketjil jang mendatengi, dan ia kenali kapalnja Jacopo. Ija membri satoe tanda, jang lantas djoega disahoeti oleh Jocopo; doewa, djam kemoedian Jacopo soedah ada di depan Dantes.
Dalem doewa pertanjaän jang ditanjakan oleh Dantes, ija di bri doewa penjahoetan jang terbitken doeka hatinja: Dantes toewa telah meninggal; Mercedes telah mengilang dari desanja.
Dengen ajer-moeka tedoeh, Dantes denger itoe doewa kabar jang djelek; kamoedian ija lantas pergi ka tengah darat sendiri-diri.
