— 365 —
matroos itoe; tapi baroe sadja ija djalan beberapa langkah, matroos itoe lantas menjoesoel dan berkata padanja:
„Maäf, Toewan! akoe rasa toewan kasalahan; toewan berniat aken membri padakoe barangkali doewa frank, tapi soedah sala kasihken satoe oewang emas.”
„Ja, benar sekali, sobat!” sahoet Dantes: „akoe soedah kasalahan; tapi sebab hatimoe ijang djoedjoer haroes dapet poedjian, biarlah kaoe trima lagi ini satoe oewang emas, boeat kaoe serta teman-temanmoe minoem atas kawarasankoe.”
Itoe matroos djadi tertjenggang, hingga ija tida ingat aken bilang trima kasih pada Dantes; ija tinggal mengawasi pada Dantes ijang berlaloe, kemoedian ija berkata sendiri-diri:
„Tentoe sekali toewan ini saorang kaja besar ijang baroe datang dari Hindia.”
Dantes teroesken perdjalanannja dengen beringat pada segala perkara di tempo doeloe.
Tempo ija sampe pada oedjoeng djalanan Noailles dan dapet lihat djalanan de Meillan, kakinja djadi lemas, hingga ampir ija roeboeh di djalanan. Achir-achirnja ija sampe ka depan roemah ketjil, di mana doeloe ajahnja ada tinggal.
Dantes bersender pada soewatoe poehoen dan berdiam sekoetika lamanja dengen berpikir dan mengawasi pada tingkatan-roemah ijang paling tinggi. Achir-achirnja ija masoek ka roemah itoe dan menanjaken pada toewan roemah, kaloe-kaloe masih ada tingkatan ijang belon tersewa. Sasoedahnja mendapet taoe, bahoewa samoewa tingkatan roemah itoe soedah ada ijang isiï, Dantes lantas meminta idzin boewat lihat tingkatan ijang kalima, hingga si toewan roemah lantas naik ka tingkatan itoe dan meminta pada penjewanja, soepaja penjewa itoe boleh kasih lihat tempatnja
