— 401 —
Napoleon tetap bertachta, sekarang inilah ijang djadi lantaran aken Fernand itoe trima soekoer dari kaoem Bourbon. Ija balik kombali ka Frankrijk dengen berpangkat Luitenant, dan dari sebab tertoeloeng oleh itoe Generaal ijang dapet banjak koernia Radja, maka di tahon 1823 ija djadi Kapitein, ja-itoelah pada tempo Frankrijk perang sama Spanje, dan Danglars moelai beroentoeng. Kerna Fernand seorang bangsa Spanje, ija dikirimken ka Madrid, aken tjari taoe begimana adanja pikirannja ija poenja bangsa. Di sana ija bertemoe dan bersobat pada Danglars; kemoedian ija bri taoe pada ija poenja Generaal, ijang Generaal ini nanti dapet bantoean dari banjak orang Spanje di iboe kota dan di provincie-provincie Spanje; ija didjandjiken gandjaran besar dan djandjiken djoega oepahan pada lain-lain orang ; achir-achirnja ija antarken satoe balatantara berdjalan ka tanah Spanje dengen liwat di djalanan pada lamping goenoeng-goenoeng ijang terdjaga oleh orang-orang ijang telah djadi sobatnja: pendeknja, di dalem itoe peperangan ija bekerdja sekali aken goena Generaalnja hingga pada sesoedahnja kota Frocadero dapet dirampas, ija diangkat djadi Kolonel dengen dibri bintang badahari Legioen van Eer dan gelaran Baron.
„Oh, peroentoengan manoesia tida sekali ada dengen sepantasnja!” kata itoe Pendita dengen soewara perlahan.
„Ja," kata Caderousse: „tapi dengerlah: apa ijang saja tjeritaken, itoe poen belon semoewa. Tempo itoe perang Spanje soedah berenti, Fernand ada seperti poetoes dari perdjalanannja, kerna lama di benoewa Europa tida ada perkara perang, katjoewali di Griekenland, di mana rahajat ada berontak pada Toerki. Maka semoewa orang ada seper-
