— 403 —
perkara-perkara loewar biasa, hingga sekarang tjeritamoe ini tida terbitken kaheranan besar di hatikoe.“
―„Pada moela kali Mercedes itoe ampir djadi gila, oleh kerna adanja ketjilakaän ijang menerkam pada Edmond. Saja telah bilang djoega padamoe, bahoewa dengen sebrapa boleh ija soedah tjoba minta kasihannja toewan de Villefort, dan ija telah njataken djoega tjintanja hati pada ajahnja Edmond. Sedeng ija berdoeka sanget, datenglah poela lain perkara ijang menjoesahi hatinja: jaitoelah berangkatnja Fernand ka dalem balatantara. Ia poen tida taoe kadoerhakaännja Fernand. dan ija ada pandang Fernand itoe seperti soedara. Fernand itoe berangkat, dan Mercedes tinggal sendirian sadja. Tiga boelan lamanja ija menangis sahari-hari; tida dapet kabar dari hal Edmond, tida dapet kabar dari hal Fernand, dan melinkan ada sadja ajahnja Edmond ijang ampir mati dari sebab itoe ija bersangsara sadja di dalem hati. Pada soewatoe hari sebegimana biasa ija berdoedoek pada tikoengan dari djalanan Marseille ka desa orang Catalaän, kerna maskipoen ija telah mengharep sehari-hari dengen berdoedoek di djalanan itoe, tida djoega ija dapet melihat toendangan atawa soedaranja mendatengi. Mercedes itoe poelang ka roemahnja dengen sanget berdoeka; tapi pada sesoedahnja ada di roemah, sekoenjoeng-koenjoeng ija dapet denger soewara kakinja orang ijang terkenal; ija menengok dengen kaget; pintoe roemahnja terboekah, laloe Fernand kalihatan mendatengi dengen berpakean tweede Luitenant.
Maka dengen girang Mercedes itoe pegang dengen keras tangannja Fernand, hingga Fernand ini djadi merasa ada tertjinta, sedeng kelakoeannja Mercedes itoe boekan sekali ada djadi dengen lantaran merasa tjinta padanja hanja
