Sutan Sari Alam
Baiti pulo balaerong sari
Nan diparancak bana pulo
Tantu galanggang nan dipancang
Bagaba-gaba bakuliliang
Bamarawa tiok tunggak
Sarato tiok-tiok suduik
Baitu puncak tampek si pangka
Dek anjuang ketek nan lah tagak
Sarato balerong tampek alek
Sarato tabuah jo aguangnyo
Iyo tampek urang main rabab
Main gandang, main rabano
Iyo canang jo talempong
Dibari ba tirai Jangik-langik
Sarato tirai dari Cino
Kilek kamilau dari jauah
Sananglah hati rang maliek
Dipuleh sagalo pucuak anau
Dari nagari nan tigo tu
Alun lai sadang itu garan
Dicari sampai ka Kajai
Ka Pinaga ka Kinali
Pucuak karambia diambiak juo
lyo karambia nan tak babuah
Atau karambia jolong gadang
Untuak panambah arononyo
Ditagakkan pulo batang pisang
Batang pinang jo daunnyo
Nan sadang rampak jolong babungo
Diagiah pulo tu mah garan
Pudiang ameh pudiang gerai
Nak ado sirah jo kuniangnyo
Disiram pagi jo patang
103
