II BUJANG PIAMAN
Dek urang Bujang Piaman
Namo tabawo dek romannyo
Alah mah gadang inyo kini
Alah baumua tujuah baleh
Sadang lamak dipandang mato
Bujang pamenan rumah gadang
Tampan anggun di ateh kudo
Bak Sutan turun dari langik
Banyaklah gadih gilo dinyo
Kudonyo tigo gadang-gadang
Rampiang bakilek katigonyo
Sikua banamo Itam Manih
Sikua lai si Balang Tigo
Nan sikua pulo Pinang Masak
Manuruik rono dang bulunyo
Duo ikua nan rancak pulo
Disambahkan Malin Duano
Kapado daulaik Parik Batu
Nan di namokan kudo Sambarani
Sarato kudo Balang Candai
Ado nan ganjia maso itu
Rajo baranak gadih rancak
Inyo baraja maracak kudo
Balang Candai di agiah ka inyo
Dek ayahnyo Tuanku Rajo Gadang
Dek inyo rajo bakuaso
Buliah babuek sakandaknyo
Indak ado urang nan manyabuik
Gadih bakudo ndak biaso
Sabagai pulo itu garan
Acok inyo pai bakudo
26
