Acok pulo basuo tu garan
yo jo Puti Payuang Lauik
Dek inyo iyo pandai pulo
Bakudo caro laki-laki
Bacarito garan Bujang Piaman
Iyo ka ayah jo Uwaiknyo
Apo garan nan tajadi
Pado maso cako itu
Sado-sadonyo disabuikkannyo
Indak ado nan dilinduangkan
Mandanga kato anak kanduang
Tunduak tangadah kaduonyo
Si Bida mapuih aia mato
Bakato inyo maso itu
Bakato tapatah-patah
Mano nak kanduang sayang Uwaik
Mandanga kato Buyuang cako tu
Lah jaleh tumah dek Uwaik
Kilek camin tu kamuko
Kilek baliuang yo kakaki
Mamintak Uwaik nak bakeh Buyuang
Ilangkan pangana Buyuang
Pangana Buyuang tantang urangko
Inyo tu sayang anak rajo
Bukan rajo sambarang rajo
Daulaik urang di Pasaman
Manangkok buiah Buyuang bako
Baun sabun dalam udaro
Buyuang batapuak sabalah tangan
Maharokkan bintang dari langik
Tutuik nak sayang mato Buyuang
Usah di tantang matohari
Silau mato Buyuang beko
40
