Mangatokan nasi lah tahidang
Agak takajuik Linduang Cahayo
Indak biaso itu garan
Si Pauyuang masuak kasurambi
Kok ayahnyo bundonyo
Sadang mangecek jo rang lain
Inyo alah mancaliak pulo
lyo dari tingkok Ustano
Bahaso si Pauyuang tu nan datang
Mandapekkan Bujang Piaman
Katiko urang sadang makan
Si Payuang indak naiak anjuang
Inyo tagak dakek tingkok
Mangecek jo dayang-dayang
Bujang Piaman itu garan
Lai pandai manahan hati
Matonyo lai nyo jago
Baitu pulo suaronyo
Galaknyo garan sanyum nabi
Indakkan tampak dari jauah
Baitu pulo kawan si Bujang
Iyolah rang mudo Buyuang Labiah
Sangaik hormatnyo itu garan
Tau bana nyo kironyo
Inyo saurang anak kampuang
Makan basamo Rajo gadang
Naiak ustano baru sakali tu
Tigo hari sasudah itu
Lah datang pulo Bujang Piaman
Kahalaman Ustano Parik Batu
Inyo datang jo Malin Maulano
Sarato dukun Katik Basa
Mairiangkan tandu Balang Candai
44
