102
TJERITA ROMAN
djangan terlaloe kebasahan, Bwee Hoa laloe masoek di oetan dan tjari perlindoengan di bawah satoe poehoen besar, jang bisa alingin dirinja dari aer oedjan.
Angin jang menioep dibaringen dengen berkredepnja sang kilat dan soeara gloedoek. Badannja Bwee Hoa bergoemeteran lantaran dingin dan takoet, ia menjender pada pongkot poehoen dan meremin matanja.
Brapa lama Bwee Hoa berdiri dalem keada'an begitoe ia tida taoe, tapi koetika angin moelai tedoeh dan oedjan moelai brenti, iapoenja seantero pakean mendjadi lepek dan badannja kedinginan. Peroetnja melilit lantaran laper, sedeng kedoea kakinja ada sedikit bengkak lantaran ketjapean.
Tapi Bwee Hoa merasa soekoer, djoega jang itoe koetika keada'an soedah remeng-remeng, menandaken soedah ampir pagi.
Oedjan masih grimis, tapi Bwee Hoa laloe kloear dari itoe oetan. Di djalanan ia denger dari djaoeh soeara kreta jang mendatengin. Ternjata kreta itoe ada kosong dan menoedjoe ka djoeroesan Tjiparoesa. Bwee Hoa laloe naek itoe kreta dan dalem keada'an sakit badan dan lahir ia sampe di roemahnja iapoenja I'ih.
