16
TJERITA ROMAN
sia sedikit toea, soedah 29 taoen. Tapi ia tida boleh diseboet djelek, djoega baek dan radjin. Saja soedah bitjaraken sendiri dengen The Sam dan ia merasa setoedjoe, kaloe gadisnja diboeat bini moeda oleh saja poenja soeami. Ini oeroesan soedah berdjalan beres, tatkala Djoen Kong termalang-malang, dan bilang jang ia boekan kambing bandot, saja djengkel betoel!”
Njonja Jansen tida oeroeng moesti tersenjoem.
„Dan apa gadisnja The Sam sendiri soedah ditanjaken pikirannja, apa ia tida keberatan?”
„Adat istiadat kita tida mengidjinken anak prempoean toeroetken maoenja dalem oeroesan pernikahan, njonja besar. Ajahnja setoedjoe dan abis perkara, sang anak moesti menoeroet sadja!”
„Tapi inget, Hong, kaloe oeroesan itoe sepertinja mengenaken kaoe poenja gadis sendiri, kaoe poenja Bwee Hoa?”
Sesoedahnja berpikir sebentar Hong Nio menjaoet dengen tetep.
„Djoega ia moesti toeroet poetoesannja orang toea.”
„Tapi, Hong, kaoe toch mengerti sendiri jang itoe ada kedjem, itoe ada tida adil!”
„Tapi itoe ada adat, njonja besar!”
