30
TJERITA ROMAN
Lantas Bwee Hoa inget jang tida lama lagi ia moesti tinggalken Pasir-Angin, di mana ia terlahir dan mangkat besar dan di mana ia pernah broentoeng. Ia moesti ikoetin iapoenja soeami, jang ia tida pernah liat bagimana romannja. Ia moesti tinggalken segala apa jang ia tjinta, njonja Jansen dan toeannja, Tek Bie, ajah dan iboenja dan itoe boekit-boekit, atas mana ia pernah memaen dengen goembira. Slamet tinggal itoe semoea.
Menginget itoe semoea berboetir-boetir aer mata djatoh di atas pangkoeannja dan boeat ini ja tentoe sadja dapet tjomelan dari mah tjomblang jang moesti poepoerin lagi pipinja, soepaja kaloe sebentar soeaminja dateng ambil padanja, ia tida meliat poepoernja belang-bentong lantaran aer mata.
Mendadakan Bwee Hoa djadi terkedjoet. Serentjeng petasan disoeloet boeat samboet kedatengannja baba penganten.
Hatinja Bwee Hoa djadi bergontjang, boekan lantaran girang, tapi lantaran sebentar ia moesti kasih slamet tinggal pada segala apa jang ia tjinta di Pasir-Angin dan pada iapoenja............. kemoeda'an.
Penganten lelaki dateng dengen kreta jang ditarik dengen koeda ampat. Semoea orang pada
