34
TJERITA ROMAN
IV.
KAMAR ka mana orang pimpin pada Bwee Hoa ada diperabotin dengen tjara rebo dan modern. Boekan lagi randjang bandji sebagimana orang sampe itoe waktoe biasa pake boeat penganten, tapi randjang boeatan Engeland, sedeng korsi-korsi dan goedri-goedri di dalem itoe kamar poen ada boeatan loear negri.
Koetika Bwee Hoa soedah berada sendirian di dalem itoe kamar, hatinja ada banjak lebih tentrem. Ia merasa jang ia berada di dalem kamarnja njonja Jansen jang djoega diperabotin ampir sebagi di sitoe, ia merasa dan mengharep jang nasibnja toch tida aken begitoe djelek sebagimana tadinja ia bajangken. Laginja kapitan Be Goat Soe ada seorang jang pernah dapet pendidikan Barat, taoe pergi di Holland dan ia sendiri pernah sekolah Blanda, hingga bisa djadi ia dan soeaminja aken bisa lebih saling mengerti.
Ia sekarang tida berpakean grombongan lagi, ia pake iapoenja pijama jang ia dapet persen dari njonja Jansen, satoe pijama soetra merah, jang sepan betoel pada toeboehnja jang molek. Ia beresken iapoenja koffer dan tjit iapoenja aer mata jang masih basah di mana pipinja.
