BWEE HOA
37
Teloek-pare? Tapi sekarang loe soedah djadi goea poenja bini dan goea tida soeka liat loe poenja segala tingka Blanda-Blanda'an, mengerti ?”
Bwee Hoa omong Blanda boeat kasih mengerti jang boekan iapoenja maksoed boeat hinaken pada Goat Soe.
„Ah, verrek,” kata Goat Soe, „sama goea loe djangan djoeal loe poenja bahasa Blanda jang terploeat-terpleot. Dan dari ini hari goea kasih inget sama loe, jang sebagi goea poenja bini moeda loe tida boleh omong Blanda sama goea dan segala loe poenja tingka Blanda-Blanda'an goea tida soedih liat!”
Bwee Hoa braniken hatinja.
„Tapi kaoe toch djoega terdidik Barat dan malah kaoe sendiri soedah taoe pergi di Holland, saja tadinja harep dengen kaoe poenja pendidikan kaoe lebih mengerti sajapoenja keada'an.”
Itoe perkata'an jang dioetjapken dengen lemah lemboet dan goemeteran roepanja membikin lembek djoega hatinja Goat Soe. Tapi dengen tida disengadja iapoenja mata dapet liat itoe boekoe „Schuld en Boete” jang tadi dipegang oleh Bwee Hoa. Ia angkat itoe boekoe dan boeka boeka, tatkala matanja dapet liat bebrapa perkata'an di dalem omslagnja.
