BWEE HOA
43
iboe dan anak berdoea'an hingga Bwee Hoa soeker boeat menoetoerken pandjang lebar tentang pengalamannja pada iapoenja iboe.
Tapi waktoe Beng Nio meleng sebentar, Bwee Hoa kisikin di deket iboenja poenja koeping.
„Iboe, saja dipoekoelin!”
Hong Nio agaknja terkedjoet sebentar, tapi lantaran Beng Nio selaloe ada di dampingnja, ia tida dapet koetika boeat menanja lebih djaoeh pada anaknja.
Di dalem perdjalanan poelang Hong Nio pikir sebentar pengadoeannja iapoenja anak, tapi koetika sampe di roemah itoe pikiran soedah linjap sendiri, kerna ia anggep satoe moestail kapitan Goat Soe jang begitoe sopan bisa poekoelin anaknja dengen zonder ada sebabnja. Tentoe Bwee Hoa telah berlakoe koerang adjar dan satoe istri jang koerang adjar memang pantes dapet poekoelan, soepaja djadi kapok.
Sadjek ia beriken itoe kisikan pada iboenja, Bwee Hoa mengharep-harep jang iapoenja nasib jang djelek nanti berobah, tapi pengharepan itoe sia-sia sadja.
Pada satoe hari Bwee Hoa dengen diam-diam tjoba menoelis soerat pada njonja Jansen dengen pengharepan barangkali dari itoe fihak ia bakal dapet pertoeloengan.
