BWEE HOA
55
saken bibirnja Tek Bie jang anget beradoe dengen bibirnja sendiri, ia rasaken bibirnja Tek Bie mentjari iapoenja pipi, mata, djidat. Bwee Hoa seperti loepa-loepa inget. Ia rasaken dirinja terajoen dalem satoe awan kebroentoengan jang adjaib, soeatoe perasa'an jang ia baroe pernah rasaken.
„Engko Tek Bie, kaoe.....?” ia berbisik, ia meremken matanja dan teken kepalanja di dadanja itoe orang jang ia tjintaken.
„Ja, Bwee, lieveling, engko ada di sini.”
Dan kombali bibir ketemoe dengen bibir dan pipi dengen pipi. Mendadakan Bwee Hoa lepasken dirinja dari peloekannja Tek Bie.
„Engko Tek Bie, bagimana kaoe brani masoek di sini, apa kaoe tida takoet, apa?”
Tapi Tek Bie tertawa.
Ia tarik lagi tangannja Bwee Hoa, peloek lagi padanja.
„Bwee ,djikaloe engko moesti binasa di sini di hadepan kaoe, engko aken trima dengen ridlah hati.”
„Tapi kaoe gegabah, engko, kaoe sanget gegabah, bagimana kaloe saja poenja soeami, eh, kaloe Goat Soe dapet taoe?”
Sebagi djawaban Tek Bie berdoedoek di atas divan dan tarik Bwee Hoa di atas pangkoeannja.
