BWEE HOA
61
bah besar, waktoe njonja Jansen poen dateng di sitoe boeat tengokin pada Bie Gwat.
Dengen aer mata mengembeng, aer mata kegirangan, njonja Jansen peloek pada Bwee Hoa.
„Kaoe toch ada baek, Hoa, tida koerang satoe apa, boekan?” tanja njonja Jansen sambil eloes-eloes ramboetnja Bwee Hoa, sebagi djoega ia selaloe berboeat koetika Bwee Hoa masih anak-anak dan sering dateng memaen di roemahnja.
Bwee Hoa dengen mata bersinar memandeng pada itoe njonja jang baek. Ja, njonja Jansen, sekarang ketahoei dari itoe mata jang bening jang memandeng padanja, jang Bwee Hoa ada broentoeng. Tapi toch? Njonja Jansen bersangsi, apa betoel iapoenja sobat ada dalem kebroentoengan, kebroentoengan seperti jang ia selaloe alamken dengen toean Jansen.
Sesoedahnja marika doedoek berdoea'an, njonja Jansen sambil pegang tangannja Bwee Hoa laloe menanja dengen soeara plahan.
„Apa kaoe broentoeng, Hoa?”
Atas itoe pertanja'an Bwee Hoa toendoekin kepalanja. Ia mengelah napas, tapi sekoetika itoe djoega ia tertawa dan memandeng pada njonja Jansen dengen sinaran mata jang mengandoeng arti.
