74
TJERITA ROMAN
Tek Bie. Goea bersoempah jang paling berat sampe itoe waktoe antara goea dan Tek Bie tida pernah kedjadian apa-apa. Sekarang biarlah loe ketahoei, jang loepoenja tjemboeroean jang tida berdasar djoestroe jang telah siramin itoe bibit jang tersemboeni begitoe dalem di goea poenja hati, jang goea sebetoelnja niat tindes dengen setoeloesnja.
„Dan setiap kali loe pergi ka kota dan menginep di sana, Tek Bie dateng di sini dalem ini kamar boeat beriken itoe kebroentoengan pada goea, apa jang loe tida bisa beriken......”
Selama Bwee Hoa bitjara begitoe, Goat Soe rasaken hatinja remoek, ia toendoekin kepalanja dan dengen tida terasa itoe rotan telah djatoh dari tangannja. Dengen tjepet ia balikin badannja, kerna ia merasa maloe Bwee Hoa liat moekanja sendiri jang menoendjoekin iapoenja perasa'an hati di itoe waktoe. Ia boekaken pintoe kamar dan tinggalken Bwee Hoa sendirian.
Itoe waktoe soedah malem, di loear boeroeng koelik-koelik moelai berboenji.
Bwee Hoa bersenjoem, maskipoen ia rasaken badannja teramat sakit. Ia pergi di depan katja dan ia mesem pada moekanja sendiri jang oendjoekin bekas-bekas ebatan rotan. Sekarang apa jang ia moesti berboeat? Berdiam teroes dalem
