78
TJERITA ROMAN
IX.
PA D A itoe malem jang gelap dengen menenteng iapoenja koffer Bwee Hoa tinggalken roemahnja iapoenja soeami. Tatkala soedah sampe di depan roemahnja iapoenja orang toea, Bwee Hoa merasa bersangsi boeat masoek. Apa ia aken ditrima lagi oleh iapoenja orang toea atawa apa tida lebih baek ia lantas menoedjoe ketemoeken sadja pada Tek Bie aken ikoet padanja? Tapi sedeng ia berpikir begitoe, lootia Djoen Kong kebetoelan berdjalan kloear dan bagimana terkedjoetnja, waktoe ia menampak Bwee Hoa dalem itoe keada'an.
„Bwee, kaoe?” berseroeh itoe lootia dengen hati koeatir.
Bwee Hoa laloe menoebroek pada ajahnja.
„Oh, ajah! ajah!” dan itoe waktoe baroe Bwee Hoa poenja aer mata mengoetjoer dengen deres.
Djoen Kong laloe pimpin anaknja ka dalem roemah, di mana Hong Nio dan Bie Gwat poen sanget terkedjoet, koetika menampak Bwee Hoa ada dihadepannja.
Di bawah terangnja lampoe di pendaleman baroe lootia Djoen Kong dapet liat, bagimana moekanja Bwee Hoa pada mateng biroe. Ia poenja darah lantas mendidih dan dengen kreketken gigi
