BWEE HOA
87
tan dan selaennja tjantik tentoe djoega banjak emas intennja.
„Soedah!” kata pemoeda jang oleh kawan-kawannja diseboet graaf Matjan Pintjang, sebab kakinja jang sebelah rada pintjang bekas penjakit Pehong,” goea soedah bosen loe orang kaga ada laen jang diseboet si Bwee, dan lagi sekali si Bwee, seperti djoega di Pasir Angin kaga ada laen prempoean jang lebih tjantik seperti si Bwee!”
„Tapi biar begitoe,” kata baron Radio Rebek, siapa dikasih nama begitoe lantaran tengorokannja pernah berkenalan dengen penjakit radja singa,” si Bwee toch paling menarik, paling djinek, tapi paling soesah ditangkep, sehingga kitapoenja tay-ong Tjioe Ling kepoetoesan akal dan kabarnja soedah pikir-pikir boeat makan siangkalim sadja lantaran tra tahan menanggoeng terlampau banjak rindoe. Adoe, mah!”
Tjioe Ling jang sedeng hadepken satoe botol brandy dan berada dalem keada'an sinting laloe tertawa berkakakan. Ia iroep lagi satoe glas dari itoe minoeman dan berkata:
„Ini dia itoe siangkalim, sobat-sobat! Mari minoem sama-sama!"
Kemoedian ia berkata poela:
„Kaloe goea maoe dapetin si Bwee dengen
