BWEE HOA
93
lakoenja Tjioe Ling jang berkata lebih djaoeh dengen perkata'an lebih sabar:
„Kaloe loe orang liat prempoean sedikit bagoes, lantas segala pikiran boeroek timboel di loe orang poenja hati. Djangan membantah, di antara loe orang djoega teritoeng goea sendiri. Perkata'an jang goea oetjapken sekarang ditoedjoeken boeat loe orang semoea, seperti djoega pada diri goea sendiri.
Ja, prempoean, itoe di mata loe orang semoea, tjoema berarti koelit jang bersih, mata jang tjeli, idoeng bangir, potongan gitar dan setaoe apa lagi, tapi loe orang loepa, jang di dalem itoe badan jang loe orang inginken ada tersimpen satoe hati. Itoe hati bisa merasa perih, bisa merasa loeka dan bisa merasa antjoer, tapi loe orang tida pikir itoe semoea.”
Tjioe Ling brenti sebentar dan sambil toendoekin kepalanja ia berkata lagi dengen soeara lebih plahan:
„Ja, loe orang sering kasih alesan. Kita orang berboeat begitoe atawa begini, lantaran prempoean jang kasih sebab. Prempoean jang sengadja berpakean begitoe roepa boeat timboelken napsoe hati kita, tapi bagimana boengah di kebon bisa menjegah jang dirinja menarik hati? Tapi loe orang poenja tangan jang djail boekan
