94
TJERITA ROMAN
petik itoe boengah boeat dipandeng dan ditjioem sadja wanginja, tapi boeat dipetik dan kemoedian dilempar. Loe orang pandang itoe boengah tapi loe orang loepa, jang boengah itoe ada manoesia, tida beda dengen loe atawa goea.”
Tjioe Ling oetjapken itoe semoea perkata'an dengen begitoe soenggoeh-soenggoeh, hingga keada'an di dalem roeangan mendjadi soenji seperti dalem gredja.
„Bwee Hoa oepamanja,” kata poela Tjioe Ling, „sebab ia djanda dan sebab loe orang denger orang poenja lida boesoek, jang ia telah berkendak dengen seorang lelaki laen, loe orang lantas anggep jang itoe ada loe orang poenja kans boeat tjitjipin djoega madoenja. Kaloe loe orang meliat seorang prempoean jang ampir djatoh, loe orang boekan toeloeng atawa pindahken ka tempat jang lebih aman, tapi loe orang djorokin baroe merasa poeas, kaloe itoe prempoean soedah djatoh betoel-betoel di dalem loempoer! Di sitoe itoe prempoean terasing dan tertjela oleh sedoenia, mati tida, hidoep poen tida dan siahwee kita djidji pada orang-orang begitoe, sebab siahwee kita ada siahwee dari dewadewa atawa manoesia-manoesia setengah melaikat!
„Loe djangan mesem, Loe maoe bilang: 'Ja.
