Halaman:Darah Kotor.pdf/34

„Bae!” djawab si Djahat. Bininja Eng Koan kata-katain lakinja kenapa sama soedara riboet sampe begitoe dengen boeka segala resia jang kotor-kotor. Apa memang sengadja maoe kasi orang banjak taoe. „Biarin orang taoe, goea si kaga maloe! Memang dari doeloe djoega kaloe orang tanja, goea kaga bilang dia entji goea. Segala djobong di akoein soedara? Bapa goea mati ’kan lantaran mereres pikirin dia!” Si Djahat djadi menangis lantaran maloe kena dibongkar resianja didepan si njonja mantoe (ipar). la tida kata satoe apa lagi, lekas masoek dan bentak-bentak si Koenjit soeroe lekas kloear. Si Koenjit djadi soesa ati dan maloe sanget, mana anaknja nangis sadja lantaran sakit. Tapi sebentar djoega itoe ma sama anak dan tjoetjoe jang masi baji, soeda brangkat sedeng bininja Eng Koan pesen dia djangan boeat taro di ati, djamaknja soedara sama soedara, kapan-kapan ia maoe milir djoega. Begitoelah maka si Djahat soeda poelang bersama anak tjoeijoenja dan lantaran dia poenja sala djoega, ia panggilin sinshe boeat obatin si Roti. Sampe stenga boelan, betoel itoe anak soeda bae, tapi tangannja jang kanan djadi sengkok, tida bisa ditoeloeng lagi, sedeng itoe sinshe bilang, kaloe sama dokter, tentoe dipotong. Koenjit baroe senang hati liat anaknja soeda