bae, kendati sengkok sedikit ia pikir asal idoep, masa kenapa.
la tida maloe-maloe gendong anaknja djalan-djalan diloear roemanja dan kaloe orang-orang tanja, ia kata memang ia poenja anak, tida maoe taoe apa nanti orang kata diblakangnja. Tjoema ia tida bisa ketemoe lagi si Djoened, sebab ma'nja sekarang djaga keras, oepama soeda basa kaoedjoenan baroe pake pajoeng, Saonah djoega soeda tida njoetji sama dia, sebab si Djahat tida maoe bikin hoeboengan lagi satoe apa dengen itoe prempoean Selam, jang soeda gembrengin itoe perkara dalem kampoeng, sedeng doeloe soeda dipesen bae-bae, djangan sampe resia terboeka. Tetapi ia tida pikir, kendati Saonah toetoep resia, tapi dengen gendong-gendong anak toch si Koenjit boeka resia sendiri.
Sedari dia poelang, Akin belon satoe kali adjak anaknja omong satoe pata, ia belon taoe pegang-pegang tjoetjoenja, jang mana si Koenjit djadi sakit ati sekali.
Pada soeatoe hari, Asiong dateng diroema Akin, jang djadi soeka hati dapet ketemoe lagi itoe orang moeda jang bae, ia adjakin doedoek minoem thee dan ngoedoet hoentjwe sembari ngomong banjak perkara, teroetama oeroesan dikampoengnja di Tiongkok.
Asiong diam-diam ada awasin si Koenjit, dan ia tanja djoega pada Akin, apa dia itoe anak jang dikata baroe bertjere dari lakinja. Tempo Akin
