44
begitoe. Malahan moesti lekas sedoe thee, siapa taoe kaloe itoe tetamoe maoe kasi kaoentoengan dan itoe kaoentoengan goea tida makan sendiri, loe djoega jang paling kenjang pake, loe maen, loe belandja saban hari boeat peroet loe sendiri, goea makan nasi sama sajoer tauhoe ampir begitoe saban hari.
Seperti itoe Tjay Afoek, jang datang tadi siang, loe katain dia perongrongan, loe kaga taoe dia datang maoe apa? Koerang adjar, dia maoe minta si Koenjit bakal bini, loe taoe?
Dia minta bakal adenja, Asiong, jang dateng doeloean brapa hari. Bermoela goea ketemoe dia ditempat orang kawin di Sawa Besar, jang itoe malem goea pegi, disini dia tanja goea, dan goea bilang ada poenja satoe anak prampoean, soeda kawin baroe satoe taon soeda bertjere dan dapet anak prampoean, sekarang itoe anak oemoernja doea boelan. Sekarang dia dateng sendiri maoe liat, dan lantas soeroe soedaranja dateng bitjarain.
Apa loe maoe kata dia perongrongan djoega?”
Dari tadi si Djahat dengerin sadja sembari pikir-pikir dalem hatinja, ia mengarti ia memang sala besar. apa jang lakinja kata memang betoel. Sekarang ia denger anaknja ada jang minta bakal bini, ia loepa oeroesan dirinja sendiri, lantas ia menjaoet:
„Abis, apa loe kata sama dia?”
„Goea kata maoe bedami doeloe sama loe,
