48
perna djoega liat Djoened dari kedjaoehan, njata badannja djadi koeroes.
Tempo si Djoened dapet liat dia pertama kali sesoedanja berpisa begitoe lama, njata moeloetnja tersenjoem, moekanja djadi terang dan matanja seperti menjala saking girangnja dan tingkanja moedoer madjoe, maoe memboeroe, tetapi tida brani, boleh djadi lantaran soeda diantjemin oleh si Koenjit poenja orang toea dan seperti si Djoened ada merasa dirinja boekan bandingannja, jang sekarang soeda tida boleh berdeket lagi.
Kaloe Koenjit inget begitoe, ia djadi sedi dalem hatinja, ia kesian pada si Djoened, sebab apa bedanja sama dia, jang soeda kangen sekali ingin bertemoe.
Saban-saban Koenjit poelang karoema orang toeanja aken tengokin anaknja, tempo-tempo ia dateng sendirian, soeka djoega dateng berdoea lakinja.
Kaloe dateng sendirian, selamanja diwaktoe siang, dan tentoe sadja Asiong tida bisa anter, sebab sedeng bekerdja, tjoema sama satoe boedjang prampoean sadja. Asal poelang, selamanja ia tjari akal boeat ketemoein si Djoened, maka ia sengadja pergi ka kali, sebab ia tida lantas datengin sadja karoemanja, biar begimana djoega ia saorang prampoean, merasa maloe bikin begitoe.
Satoe kali tempo Koenjit poelang (melantjong) karoema orang toeanja, ia pergi ka kali, jang ia
