Akin, jang begitoe bae, berbalik soempain itoe prampoean, orang minta-minta biar itoe prampoean dapet balesan jang pedes dari klakoeannja.
la poenja anak, nona Koenjit, lantaran saban waktoe dapet liat itoe tjonto dari iboenja, ia djoega kira itoe adat ada paling soeroep dipake oleh orang prampoean, maka ini anak djoega djadi kentes sekali, ditamba dengen tingkanja jang genit; sedikit apa lantas poera-poera kaget dan adjokin seperti orang lata, kaloe soeda lantas toetoep moeloetnja tertawa tjekikikan. Masi ketjil, matanja soeda bisa melirik, lebi tadjem dari piso raoet; kaloe djalan dia bikin-bikin sampe djadi elo sekali, lenggangnja pandjang, orang kata lenggang pata doeablas, kaja tali pending.
Orang moeda-moeda banjak jang pikirin si Koenjit, banjak jang kepintjoet sama tingka-tingkanja jang manis, tetapi orang toea-toea djebiken bibir, sebab dipandang tingka begitoe, soeda tida sala lagi tingka anak-anaknja pappa De Bruyn di Djembatan Senti.
Iboenja bangga sekali liat banjak orang melirik pada Koenjit, ia pikir anaknja ada begitoe boto, banjak lelaki moeda sering dateng di waroengnja poera-poera bli roko atawa laen-laen, tapi sebetoelnja ada lebi banjak boeat bisa pandang Koenjit dari deket, atawa soekoer kaloe bisa pasang omong dengen itoe prawan. Sang iboe pikir,ini ada bae sekali, sebab anak prawan memang
