ini perkataan, hatinja Djoened jang memang sedeng kebakar soeda sama djoega disiremin benzine, djadi menjala mingkin keras.
Blakangan, sering kali ia kaloe ketemoe seperti maloe-maloe dan tempo-tempo ia bengong sedeng matanja awasin Koenjit Kaloe begitoe, Koenjit lantas tertawa sembari tepok poendaknja Djoened ditanja kenapa dia bengong sadja, apa dia pikirin koki temen kerdjanja?
Djoened terpaksa tertawa djoega, tetapi ia bilang koki digedong orangnja soeda toea, dan Saonah djoega tertawa sembari bilang seperti dia orang miskin, ada soesa boeat kawin.
Ini perkataan miskin bikin Koenjit djadi kaget, ia djadi timbang-timbang kedaän dirinja sendiri, apakah dia boekan miskin djoega? Tetapi ia rasa kaloe dibanding dengen Saonah, tentoe sadja ia boekannja miskin, tetapi ia maoe toe betoel begimana jang diseboet miskin, sebaliknja dari kaja; ia lantas menanja itoe pada Saonah jang kasi ketrangan, orang kaja jaitoe jang diam diroema gedong, piara banjak baboe dan djongos, piara koeda kreta dan laen-laen. Kaloe boekan orang kaja, tida banjak oewangnja, mana bisa piara atawa lebi betoel ongkosin itoe semoea?
Koenjit djadi merasa tida enak hati, sebab ia tinggal dalem roema bamboe beratep kaleng, tida pake djoebin, tida ada poenja baboe atawa djongos, apa lagi koeda kreta. Lantaran itoe, ia djadi merasa ia ada anaknja orang miskin. Ia tida
