Halaman:Darah Kotor.pdf/87

tetapi di inget jang ia soeda ikoet padanja begitoe lama, djadi kesian djoega, panggilin sinshe doekoen boeat obatin, tetapi mana bisa toeloeng? Begitoelah si Koenjit soeda merasa jang ia tida aken tinggal idoep lama lagi satoe kali ia kaokin anaknja jang soeda boelannja maoe branak, pada itoe anak ia kata: »Goea soeda kaga bisa tahan lagi, lantaran loe maka goea djadi begini. Goea tida bisa kata apa, tapi goea takoet loe nanti dapet pembalesan begini djoega dari anak loe”. Si Rotti melengos, ia soeda tida soedi liat moeka Ma’nja lagi, ia bentji itoe Ma, sebab apa kata soeda djadi madoenja. Kaloe tida takoet ketaoean, barangkali ia soeda tjekek Ma'nja biar lekas mampoes. Si Koenjit liat moeka anaknja, ia mengarti si anak memang bentji sama dia. »Goea taoe, loe bentji sama goea,” kata dia lagi. „Tida oesa loe oendjoek moeka sial, goea moesti mati, loe boleh senangin ati berdoea si gladak. Tapi segala apa ada pembalesannja, loe rasa nanti. Ja, nanti, sebab pembalesan Allah boekannja kaja makan tjabe, begitoe makan lantas merasa pedes. la tida bisa teroesken perkataannja, sebab merasa terlaloe tjape, napasnja sengal-sengal, kemoedian ia batok begitoe berat dan kloear banjak dara dari moeloetnja. Si Rotti Jantas tinggal kloear, antepin si sakit