-- 88 --
si Boentjis, tingkanja keliwat genit, lantaran di alemin sadja oleh Ma'nja mingkin olo-olo, mingkin betingka, kaja ini goea.
Ini anak prampoean, jang biasanja moesti mirip sama bapa, tetapi mirip sama Ma, badan tinggi koeroes dan bongkok oedang, tangan sengkok, mata kaja mata tikoes, jaitoe mata djahat, pipi tembem dan djantoek, lida pendek, soeda tidak beda Ma'nja; moeloet lemes, bisa sekali katain orang hingga segala orang jang soeda kenal, tentoe gojang kepala dan diam-diam orang berbisik, itoe anak, si Boentjis, tentoe bakalan tida oeroes.
Oemoernja baroe masoek 14 taon, tapi soeda taoe segala roepa, sampe segala perkara jang tjoema biasa disimpan resia, ia soeda mengarti betoel. Si Ma, jaitoe si Rotti roepanja bangga ada poenja anak prampoean begitoe pinter, sama djoega Matoeanja doeloe, itoe njonja Akin, alias si Djahat, harepon anaknja bisa dapet laki kaja, begitoe djoega pengharepannja si Rotti.
Ia lepasin anaknja sasoekanja batja segala sair pertjintaan, ia sengadja batja koeat-koeat biar orang banjak denger. Kaloe liat begitoe dan denger apa perkataan jang dibatjanja, boekanjja si Ma gegerin sebab itoe perkataan semoea ada perkataan kotor, malahan dia djoega ikoet tertawa tergelak-gelak dan nengok sana sini kepengen laen-laen orang djoega ikoet tertawa seperti dia, boeat poedji anaknja jang pinter.
Kalo itoe anak tjerita sama temennja anak..
