--8--
mengarti kenapa manoesia didoenia ada jang kaja dan ada jang miskin
Koetika ia poelang keroemanja dan kebetoelan sedeng sepi, ia doedoek ngelendot pada iboenja dan tjerita apa jang tadi ia denger dari Saonah. Sekalipoen itoe taon ia soeda masoek oemoer 15 taon, tetapi dihadepan iboenja ia masi seperti anak ketjil jang aleman.
Iboenja tertawa denger itoe tjerita dan sembari oesap-oesap kepalanja itoe anak, ia pandang moekanja dengen merasa hatinja sabesar goenoeng, sebab anak masi begitoe ketjil, soeda ada poenja pikiran atas hal kaja dan miskin. la rasa anak jang ada poenja pikiran begitoe, ada anak pinter dan tjerdik sekali, ia rasa tida boleh sala lagi kemoedian Koenjit tentoe dapet laki kaja.
Seperti memaen ia kata djoega, boleh djadi dan ia harep Koenjit nanti dapet laki orang kaja.
Akin dengerin sadja itoe iboe sama anak omong omong, achirnja ia tertawa dan bilang, satoe orang kaja tida nanti dateng minta anaknja toekang waroeng dikampoeng. Kendati orang soeka sama anaknja, toch orang takoet sama orang toeanja poenja kamiskinan. Doeren tentoe sama doeren, masa ada matjan berbini andjing
Bininja djadi marah sekali denger begitoe, dan lantaran itoe sadja, ia soeda djadi riboet moeloet. Itoe malem Koenjit soesa maoe tidoer, soeda lama djoega ia berbaring, tetapi matanja tida
