Liwat doea hari sedari timboel itoe pertjakepan keliatan bae si Rotti, bae si Boentjis, anaknja, tida kloear lagi, sebab si Tong betoel soeda toelisin dia soerat kasi bapanja taoe. Si bapa tidak bikin riboet, itoe betoel, boeat apa riboet, paling betoel djaga anaknja lebi teliti.
Tetapi, orang kombali bitjaraken itoe perkara dan masing-masing tidak pertjaja jang si Boentjis bisa djinek diroema, dasarnja atinja soeda djahat, darahnja kotor, tjoba sadja liat, sampe brapa lama dia bisa djinek dalam roema.
Ini doegaan betoel djoega, sebab belon ada sepoeloe ari, keliatan si Boentjis soeda ada kombali didjalan dan oendjoek genitnja, segala apa ditanja, segala apa di tertawain.
Orang heran, kemana orang toeanja? Bapanja pergi kerdja, Ma'nja pergi karoema orang mati.
Patoet si Boentjis ngeprit ka kali ikoetin itoe anak Selam dari Kebon-sajoer barangkali ampir doea djam, baroe ia kloear.
„Ja, dia sape disitoe, liat kita koempoel disini, dia masoek lagi kedalem gang, engga lama itoe anak Selam djalan kloear kadjalan tram, kira ada saisepan roko, si Boentjis djoega kloear poelang karoemanja, moekanjda poetjet seperti ketakoetan.”
„Ai, anak Selam, itoe jang poeti-poeti saban pagi liwat kemari?”
„Ja!” kata saorang.” Djangan-djangan di kakoes dia maenin, itoe anak soeda bengal.
„Masa bodo.”
