Begitoelah orang djadi merasa tjoeriga, apa perloenja si Boentjis ampir doea djam tinggal di kakoes sama satoe anak Selam, jang soeda bengal? Kenapa dia soeda kloear sampe di moeloet gang serta liat orang banjak ada awasin padanja lantas dia moendoer masoek lagi kedalem gang? Kenapa tida lama lantas itoe anak djedjaka kloear doeloean, blakangan baroe si Boentjis kloear noendoek sadja djalan poelang dengen moekanja terpoetjet-poetjet?
Ini hal sampe sekarang soeda seboelan lebi, jaitoe dari boelan Juni 1921 orang masi boeat omongan. Dimana ada orang tertawa-tawa, soeda tida laen ada ngomongin perkara si Boentjis, anak prawan jang orang sangsi apa masi bersi?
Kita sengadja karangin ini sebegimana adanja, boekan dengen maksoed bikin maloe itoe orang, hanja seperti pendjaga, ati-atilah segala perboeatan, jang boleh menjangkoet nama kebangsaan. Kaloe tida dibikin begitoe, dikoeatir nanti orang brani tiroe klakoeannja itoe gadis Djembatanboesoek jang bernama si Boentjis poenja klakoean boesoe.
Laen dari itoe, soepaja kaloe ada entjim-entjim maoe tjari mantoe, biarlah awas, djangan sampe kena pili telor boesoek, sajang kita poenja anak boea moesti dirangkepin sama telor boesoek, toeroenan darah kotor!
Sebegitoe sadja kita poenja maksoed!
