„DIA. . . .”
Lantaran dalem itoe toko, di mana ada didjoeal barang makanan dan minoeman, banjak sekali orang belandja, itoe gadis poen toeroet melajanin dengen sampoerna. la membantoe boengkoes barang, toelis bon dan lakoeken laen-laen pakerdja’an, tida berbeda saperti penggawe jang laen.
Sampe ampir sore ia lakoeken pakerdja’an bagitoe, dan kamoedian ia masoek. Roepanja itoe waktoe ia tida ingat pada-apa jang terdjadi di Pasar Gambir. Tida lama kamoedian kombali kaliatan ia moentjoel di roeangan depan, tapi kombali sekarang ia berpakean laen. Tadi ia poenja badjoe berwarna dadoe, sekarang ia memake badjoe jang berwarna biroe laoet. Apakah boleh djadi lantaran itoe waktoe ia anggep pakerdja’annja soeda beres, maka ia perloe toekar badjoenja jang soeda djadi koetjel. Sekarang ia mempoenjai tempo boeat lajangken pikirannja; ia laloe doedoek mengadepin satoe medja, dan sambil toendjang djanggoet ia lajangken pikirannja dan kadang-kadang ia dibikin kaget oleh satoe penggawe jang dateng bawa oewang dan serahken padanja.
Boleh djadi itoe gadis ada poetrinja orang jang poenja itoe toko dan di waktoe orang toewanja tida ada di sitoe, ia berlakoe sebagi pengganti dan trima oewang.
Pada kira-kira djam toedjoeh malem, keada’an dalem itoe toko soeda moelai sepi.
8
