192
PENGHIDOEPAN
akoe liat sinar-sinar terang mengkredep seperti kilap, rasa sedikit poesing melipoeti antero oeratkoe, sedeng romannja Holbaz jang berdiri di depankoe semingkin lama bertambah besar seperti raksasa. Akoe liat iapoenja tangan diangkat ka atas, dan matanja, seperti lampoe electrisch jang menjalah silo sekali saolah-olah maoe membakar dirikoe—dan kamoedian laksana koemandang (echo) jang djaoeh akoe dapet denger soeara oetjapannja Holbaz sebagi berikoet:
„AZUL! AZUL! Angkat ka atas ini Roch jang tenang serta brani dalem kaoe poenja daerah astral; djadilah iapoenja pengoendjoek di atas itoe djalanan dimana ia pantes masoek; toeloeng ia melajang dengen tetep ka itoe Daerah jang indah dari Oedara; kasihlah ia kakoeaten serta penerangan boeat liwatin itoe lingkoengan lingkoengan jang gilang-goemilang menoeroet iapoenja kamaoean; dan djika berharga, adjak ia boeat memandang, maski tjoema sabentaran, di atas itoe bagian dari Permoelaan dan Oedjoengnja doenia-doenia. Oleh itoe pengaroeh jang kaoe briken dalem dirikoe, akoe bantoe pisahken ini roch; perhatikenlah, AZUL, lekas samboet iapoenja koendjoengan !“
Satoe kagelapen jang loeas dengen tjepet menoetoepi antero pemandangankoe, dan antero akoe poenja tenaga linjap, jang achirnja akoe rasaken terangkat ka atas dengen koeat serta begitoe pesat, teroes ka atas dan ka atas, sehingga di satoe tempat kosong gelap jang
