149
koen ada permeisoeri dari radja doeloe kala. Kerna sekarang dia bagitoe angker, biarlah kita orang pergi ka dia poenja bio dan soedjoed padanja.
Kamoedian dia-orang samoewa lantas naik ka itoe goenoeng, dan satelah sampe di hadepan pintoe bio, dia-orang disamboet oleh satoe prampoewan toewa jang djaga di sitoe. Samoewa lantas toeroen dari koedanja, teroes masoek ka dalem bio itoe. Di sitoe dia-orang dapet lihat Tjiauwkoen poenja gambar jang bagoes sekali, sampe kalihatan seperti orang hidoep dan ada terapit kiri-kanan dengen doewa gambar lain-orang jang satoe pegang pipe jang lain memegang sendjata. Siotjia lantas madep gambar itoe, berloetoet sembari menangis, kasih taoe semoewa kasoesahannja dan minta Tjjauwkoen poenja toeloengan, soepaja dia dapet satoe alamat jang baik. Itoe anak-anak prawan djoega samoewa menangis dan kasih taoe dia-orang poenja soesah. Habis itoe, lantas Siotjia kasih taoe pada itoe prampoewan jang djaga bio, jang dia serta semoewa anak-anak prawan pengikoetnja menginep di sitoe, dan minta disadiain tempat. Kamoedian dia lantas kasih printah pada sekalian pengikoetnja jang lain lain, jang dia orang semoewa misti pergi menoenggoe di kaki goenoeng.
Pada waktoe malem, sedeng Siotja lagi ti-
