151
taoe, jang goenoeng itoe bernama Pokthiansan, dan pada tempo doeloe Ong Tjiauwkoen taoe pergi di sitoe dan panggil satoe boeroeng, soeroeh dia bawak soerat. Siotjia denger begitoe, lantas berkata pada semoewa anak prawan pengikoetnja: Marilah sekarang kita orang pergi ka goenoeng itoe; kaloe Toehan Allah ada kasian, barangkali kita djoega bisa kirim soerat sama boeroeng. Semoewa anak prawan itoe lantas memanggoet dan bersedia aken berangkat. Orang orang Tattan jang iringken Siotjia, lihat itoe, semoewa lantas menjegal dengen berkata: Ini goenoeng tida sama seseperti goenoeng jang lain lain; menoesia poen tida taoe pergi di sitoe, sebab ada banjak sekali binatang liar, apa lagi djalanannja ada begitoe soesah: kaloe djatoeh, lantas tida nanti katoeloengan lagi: maka hamba moehoen djangan nionio pergi ka sitoe.
Siotjia denger begitoe, lantas djadi goesar dan berkata: kamoe brani tjegah kami poenja niatan? Lain kali kaloe kamoe brani lagi bikin begitoe, kamoe nanti dapet hoekoeman. Itoe orang-orang jang tadi maoe menjegah lantas djadi merasa takoet, sebab inget jang Siotjia itoe bakal djadi Radjanja poenja permeisoeri. Dia-orang lantas sedia koeda dan Siotjia lantas brangkat djalan. Sebentaran sadja soedah sampe di kaki goenoeng Pokthiansan. Di sitoe Siotjia lantas kasih printah,
