194
jang kami maoe minta dia boewat goendik, dan kaloe dia poenja ma-bapa soekak kasih, nanti kami kasih tambah lagi, sebab kami satoe orang jang tida sajang sama wang. Kaloek ma-bapanja tida maoe kasih, kaoe tinggalken sadja ini wang di itoe praoe dan lantas rampok sadja itoe anak prampoewan, bawak di sini.
Itoe orang orang jang di prentah, lantas toeroen di satoe praoe ketjil dan teroes berdajoeng pergi. Tempo itoe orang orang soedah brangkat, ada dateng mengadep pada itoe Kang Kwe ija poenja satoe boedak prampoewan toewa. Ini boedak berkata: Kongtjoe djangan main gila! Kita di sini masih ada deket kota dan ada banjak poenggawa poenggawa jang besar. Kaloe ma-bapanja itoe anak prampoewan soeka kasiken anaknja itoe, tentoe ija orang nanti dateng anterken ka sini. Kaloe barangkali dia orang tida soeka kasi, baik djangan di paksa atawa di rampok, sebab kita orang boleh djadi dapet tjilaka, dan kaloe Loïa dapet taoe, tentoe ija djadi goesar djoega pada Kongtjoe.
Itoe Kang Kwe denger begitoe, lantas sadja membentak dengen berkata: Apa ini!? Kaoe satoe andjing toewa brani banjak moeloet? Kaloe kami kerdja apa apa selamanja kaoe soeka sadja tjampoer tape! Ini perkara masa boleh djadi apa? Kaloe sampe orang
