195
besar dapet taoe, kami nanti bilang sadja, jang ma-bapanja itoe anak soedah trima oewang pandjer lebih doeloe, dan sekarang kami maoe ambil, bawak poelang. Djangan lagi satoe kali kaoe brani koerang ajar begitoe! Pergi kaoe!
Itoe boedak toewa tida brani bilang apa apa lagi, dan lantas sadja pergi ka belakang. Itoe waktoe lantas Kang Kwe kasi prentah pada orangnja soepaja brenti-in praoe boewat menoenggoe.
Itoe orang orang jang di soeroe bawak doewit, sesampenja di praoe Gioktjia, lantas sadja ija orang naek. Emanja Gioktjia lihat begitoe, lantas berkata: Kaoe orang dateng maoe apa? Saja tida ada poenja ikan boewat djoewal.
Itoe orang orang jang banjak lantas berkata: Kita orang dateng boekan maoe beli ikan.
Emanja Gioktjia lantas berkata: Kaloe boekan maoe beli ikan, kaoe orang maoe apa?
Itoe orang orang menjaoet: Kita ada orang orangnja tihoe di sini poenja anak jang bernama Kang Kwe. Ini Kongtjoe kabetoelan liwat di sini, ija soedah dapet lihat, jang kaoe ada poenja satoe anak prampoewan jang roepanja bagoes. Sekarang kita dateng dengen Kongtjoe poenja prentah, boewat mintak kaoe poenja anak djadi goendiknja, dan
