219
Dija-orang laki-istri tida ada poenja lain anak, melinken itoe sadja satoe anak prampoewan, jang bernama Insian dan beloen bertoenangan. Lain dari itoe ada lagi Tetok poenja kaloewarga, jaitoe satoe soedara prampoewan, jang soedah kawin sama Bwee Kwee dan sekarang soedah dapet satoe anak lelaki bernama Liang Giok.
Sadari di Siangtjioe soedah berpisah sama anaknja, itoe Bwee Kwee poenja hoedjin soedah dateng pada soedaranja dan noempang tinggal di sitoe, dan sampe sekarang ini soedah satoe tahoen lamanja. Sering-sering ini Bwee-hoedjin bitjara sama soedaranja, jang Liang Giok pergi lari tjari Houw-Loan, bakal mertoewanja tida sekali terkabar apa-apa, dan dari itoe dija rasa baik, kaloe disoeroeh saorang pergi lihat. Tapi Tetok salamanja bilang Kaloe Liang Giok pergi di sitoe, tantoe sekali Honw-Loan trima, dan sekarang brangkali lagi beladjar teroes dalem perkara soerat: dija poen tantoe ada ingetan kapingin berpangkat. Boewat apalah kita soeroeh orang tengok?
Dari sebab Tetok bilang bagitoe, Bwee-hoedjin djadi tida boewat pikiran lagi.
Tempo Tetok soedah habis priksa orang, dan dia masoek ka dalem, itoe tiga orang prampoewan masih ada doedoek berkoempoel, dan Tetok lantas toeroet doedoek sama-sama di sitoe.
