237
tas berkata padanja: Sinshe! Loïa sering sekali kasih taoe, jang sinshe banjak sekali toeloeng dia dalem kerdjaännja. Sekarang sinshe dateng tinggal di sini, saja amat soeka hati ; tapi saja tiada ada poenja orang boewat temenin kaoe; maka kaloe brangkali ada koerang rawatan apa-apa, saja harep sadja sinshe tida djadi ketjil hati.
Bok Ing denger Hoedjin bitjara manis bagitoe, hatinja enak sekali; tapi dia berkata: Hoedjin bilang bagitoe, itoe ada brat sekali boewat saja. Saja poen soedah banjak trima Loïa poenja hati-boedi baik dan tida sekali bisa bales.
Dengen tertawa Hoedjin lantas soeroeh boedaknja anter Bok Ing ka kamar, jang soedah disadiaken boewat dia.
Bok Ing tinggal di sitoe seneng sekali, dan salamanja dia dapet rawatan baik: sore-pagi, pada waktoenja makan, salamanja Hoedjin soeroeh satoe boedak prampoewan bawain dia makanan jang enak-enak. Pada satoe hari Bok Ing berkata pada itoe boedak prampoewan jang biasa bawain dia makanan: Saja rasa, lebih baik djangan kaoe sendiri dateng bawain saja makanan kaoe soeroeh sadja saorang lelaki. Kaoe poen saorang prampoewan jang moeda; saja selempang nanti ada orang jang gatel moeloet dan bitjara perkara jang djoesta, bikin kita-orang djadi tiada enak.
