244
Habis bilang bagitoe, Tjoenhiang itoe lantas taroek sadja itoe toesoek konde dalem satoe tjoepoe jang ada di medja.
Bok Ing, sedari kabilangan itoe toesoek konde tanda mata, sahari-hari dia menangis sadja, sampe mendjadi sakit. Satoe boedak jang biasa oeroes Bok Ing poenja kamar, lantas kasih taoe pada Hoedjin, jang Bok Ing ada sakit. Hoedjin denger bagitoe, lantas soeroeh panggil sinshe boewat obatin.
Tempo itoe sinshe dateng memariksa penjakit, sinshe itoe bilang, maka Bok Ing itoe djadi sakit, tiada lain, melainken sebab hatinja ada banjak berpikir, dan sinshe itoe lantas sadja kasih obat. Tapi Bok Ing minoem obatnja itoe sampe doewa hari, beloen djoega djadi entengan sakitnja. Hoedjiu lihat bagitoe, hatinja djadi djengkel sekali. Itoe doewa Siotjia djoega djadi tida seneng hati; maka itoe sering sering dia-orang dateng pada Hoedjin dan tanjaken sakituja Bok Ing bagimana ada. Dia-orang selempang Bok Ing itoe nanti djadi mati. Betoel dia-orang dan Bok Ing beloen berkenalan, tapi dia-orang taoe itoe Bok Ing saorang baik.... Kaloek dia mati, boekan kasian?
Pada satoe pagi, Goat Ing dateng di kamarnja Ien Ing. Itoe waktoe Ien Ing lagi bersisir. Goat Ing berkata: Soedara bagini pagi soedah bangoen?
