254
lek. Ien Ing lihat begitoe, lantas berkata: Boetjhin! djangan nangis: Entji soedah hidoep kombali!
Hoedjin denger itoe, lantas berkata: Poedji dan hormat di sampekenlah kapada Allah!
Sasoedahnja lihat Goat Ing hidoep kombali, Hoedjin lantas inget maoe soeroe orang lihat Bok Ing. Tapi beloen sampe ija bri prentah, lantas dateng satoe boedak lelaki, dan kasih taoe, jang Bok Ing soedah hidoep kombali. Hoedjin denger itoe, baroelah hati djadi seneng sedikit. Ija lantas soeroe boedak lelaki itoe boeroe boeroe balik ka loewar dan djaga Bok Ing baik baik. Kamoedian ija lantas berkata pada Goat Ing: Anakkoe! sekarang semoewa tjilaka soedah hilang kaoe tentoe nanti djadi baik kombali.
Goat Ing menjahoet: Banjak trima kasih aken Boetjhin poenja perkata-an itoe. Tapi saja rasa, saja poenja peroentoengan soedah sampe dan tida nanti bisa hidoep lama lagi. Kaloe saja mati, saja harep Boetjhin djangan bikin banjak soesah: asal sadja saja poenja mait di koeboer madep moedik, itoe soedah bagoes boewat saja.
Hoedjin berkata: Apa jang kaoe pesen, semoewa Boetjhin nanti toeroet.
Salagi Hoedjin bilang bagitoe, hatinja ada heran sekali, jang Bok Ing dan Goat Ing
