64
Itoe doewa orang toewa berkata: Ah, sekali poen sobat soeka dateng, saja poen tida bisa trima, kerna saja poenja tempat djelek sekali. Sasoedalja bagitoe, lantas doewa orang itoe brangkat djalan.
Bwee Liang Giok djalan berpisah sendirian sembari sapoe aer matanja, kerna inget Hie Tong poenja tjilaka. Tempo mata-hari soedah moelain toeroen, dia masoek di dalem kota Tangtjioe tapi dia tida brani masoek di roemah makan, sebab dia tiada poenja oewang. Dia djalan sadja ka sana-sini sampe hari djadi malem. Itoe waktoe dia bertemoe satoe klenteng, namanja Sioeamsi, dan di samping itoe klenteng ada satoe poehoen besar. Bwee Liang Giok, tida taoe di mana misti pergi, lantas doedoek sadja di bawah itoe poehoen sampe waktoe tengah malem. Dalem hati dia berpikir dan berkata: Tempo goewa poenja bapa masih ada, goewa ada seneng sekali; ini tempo ada bagini tjilaka, tida poenja roemah tangga, ema dan anak djadi berpisah dan lagi Louw Kie ada prentah dengen kras boewat tangkep goewa anak dan ema. Kaloe goewa dapet katangkep, tantoe sekali Louw Kie keniaja. Baiklah sekarang ini sedeng tida ada orang, goewa boenoeh sadja diri sendiri.
Dengen inget bagitoe, dia menangis dengen perlahan dan boeka dia poenja angkin; kamoedian lantas dia gantoeng dirinja di itoe
