84
Kaloe bagitoe kita orang traoesa goesar sama ini Hie Tong. Dia poen sa-orang jang taoe soerat dan taoe adat; dari itoe tantoe dia mengarti djoega sama itoe perkara Bwee Kwee.
Tan Djit Sing denger istrinja bilang bagitoe, lantas pesen sadja pada Hie Tong, katanja : Lain kali, kaloe kita orang lagi plesir, djangan kamoe bikin bagitoe lagi.
Hie Tong bilang baik dan lantas pergi toeroen dari peseban.
Hing Goan siotjia, jang memang bermata tadjem, lihat kalakoe-an Hie Tong bagitoe, lantas pikir jang kalakoe-an itoe ada heran sekali, dan dia moelain timbang-timbang : apa boleh djadi kalakoe-an bagitoe roepa soedah timboel dari sebab mengarti soerat? Betoel Hie Tong poenja tingkah ada seperti tingkah orang sopan, boekan seperti tingkah boedak boedak, tapi itoe djoega bloen boleh djadi sebab aken menangis sedih sampe bagitoe boewat Bwee Kwee poenja perkara.
Salagi Siotjia pikir bagitoe, Tan Djit Sing lantas prentah satoe boedaknja, katanja : Besoek kamoe misti sadia di sini satoe medja boewat sembajang : kita orang maoe sembajangin Bwee Kwee di moeka ini poehoen Bwehoa.
Kamoedian Tan Djit Sing itoe lantas menjeboet pada itoe poehoen kembang, katanja: Kaloe itoe Bwee Liang Giok anaknja Bwee
