90
berkembang kombali. Kaloe sampe Tan Djit Sing pergi, tantoelah hamba tida bisa tinggal lagi di sini. Mintalah Toehankoe poenja kasian.
Habis itoe, Bwee Liang Giok lantas bangoen dan teroes masoek di kamarnja. Di sitoe dia lantas menangis lagi dengen pikirin emanja jang tida sekali ada terkabar apa-apa. Dia rasa, emanja itoe tantoe tiada taoe sang anak bagimana ada. Hatinja Bwee Liang Giok ada djadi sedikit seneng tempo dia inget, beroentoeng dia bloen ada poenja anak bini jang toeroet dalem dia poenja soesah. Kamoedian, sasoedahnja sedihnja djadi ilang, dia lantas berkata di hatinja: Itoe Ilouw Loan poenja anak goewa bloen taoe lihat roepanja dan bloen taoe denger djoega dari hal adatnja. Kaloe lihat Louw Loan ada berhati boesoek bagitoe, anaknja djoega brangkali tida terlaloe baik. Tapi ini Hing Goan Siotjia jang amat manis dan haloes, roepanja ada bagitoe bagoes, dan ada pinter djoega. Ai! goewa, Bwee Liang Giok. kaloe di blakang kali bisa beroentoeng dapet pangkat, brangkali boleh beroentoeng djoega berlaki bini sama dia. Tapi boleh djadi sabloen goewa dapet pangkat, dia soedah kawin lebih doeloe sama lain orang. — Ah, bagimanalah sadja goewa poenja peroentoengan.
Pada besoeknja Bwee Liang Giok pergi
