— 368 —
kringet, brangkali lantaran mengimpi impian jang koerang senang, oerat oerat di pelengannja bangoen dan bibir matanja keliatannja bengkak.
Athos mengela napas koetika dapet liat itoe perkara dan maski ia berboeat itoe perkara dengen plahan, Radja jang roepa roepanja tiada poeles betoel telah djadi sedar.
Radja Karel I boeka matanja.
„O!“ ia kata dengen toendjang badannja dengen ia poenja sikoet, „kau jang dateng, graaf de la Fere?“
„Ja, Sri Baginda,“ menjaoet Athos.
— „Sedeng akoe tidoer, kau djaga dan kau dateng bawa sala satoe kabar ?“
„Ja, Sri Baginda soeda doega betoel,“ kata Athos.
„Brangkali kabar jang koerang baek ?“ menanja Radja dengen tersenjoem sedi.
— „Betoel, Sri Baginda.“
— „Tiada apa, kaloe sadja kau dateng nanti akoe trima dengen soeka hati. Kau jang tiada perloe bela tana aer dan tiada perloe pergi koeliling lantaran dapet soesa dalem tempat sendiri, kau soeda dikirim kemari oleh Henriette; kabar apa djoega jang kau bawa, kau boleh tjeritaken teroes terang, djangan boeat kwatir.“
— „Sri Baginda, semalem Cromwell soeda dateng di Newcastle.“
„O!“ kata Radja, „boeat prangken akoe?“
— „Boekan, boeat beli Sri Baginda.“
— „Apa kau bilang?“
— „Akoe maoe bilang, Sri Baginda, balatentara Schotland moesti trima bajaran ampat ratoes riboe pondsterling.“
— „Boeat gadji iaorang, ja, akoe taoe itoe perkara Soeda satoe taon lamanja iaorang
